Ukraina dëshiron të furnizohet me armë mbrojtëse nga Gjermania. Në një letër drejtuar Ministrisë së Jashtme Kievi rendit shumë dëshira dhe kërkon që Gjermania ta shqyrtojë sa më shpejt kërkesën.

Ndryshe nga partnerët e tjerë të NATO-s Gjermania refuzon ta furnizojë Ukrainën me armë. Tani qeveria gjermane mori një kërkesë nga Kievi. Ambasada e Ukrainës ka kërkuar zyrtarisht mbështetje në formën e furnizimeve me armëve. Gazeta “Süddeutsche Zeitung” citon nga një letër drejtuar Ministrisë së Jashtme në të cilën ambasada liston një numër armësh që dëshiron Ukraina.

Në letër thuhet se për shkak të “situatës jashtëzakonisht të tensionuar të sigurisë dhe kërcënimit të agresionit rus”, ambasada kërkon që “kjo kërkesë të shqyrtohet sa më shpejt të jetë e mundur”, thuhet në artikullin e “Süddeutsche Zeitung”.

Ambasada e Ukrainës në Berlin kërkon sisteme për mbrojtjen kundërajrore ndaj raketave me rreze të mesme veprimi, sisteme kundërajrore portative, armë kundër dronëve, sisteme për shkatërrimit me mikrovalë, sisteme elektronike gjurmimi, por edhe pajisje për shikimin e natës, kamera vëzhgimi dhe municione.
Më tej “Süddeutsche Zeitung” citon nga letra se bëhet fjalë për “sisteme armësh me karakter mbrojtës”. Ukraina kërkon ndihmë të menjëhershme për t’i blerë urgjentisht këto pajisje dhe armatime.

Qeveria gjermane i ka premtuar Ukrainës vetëm dërgimin e 5000 helmetave ushtarake. Ky është një “sinjal shumë i qartë se ne jemi në anën tuaj”, tha ministrja e Mbrojtjes, Christine Lambrecht. Ambasadori ukrainas në Berlin e mirëpriti dorëzimin, por në të njëjtën kohë e kritikoi atë si një “gjest simbolik”.

Në marrëveshjen e koalicionit, qeveria federale gjermane e përbërë nga SPD, të Gjelbrit dhe FDP kanë vendosur të mos dëgojnë armë në rajone krize./DW/